Sakadang Kuya Nyieun Suling

Sakadang  Kuya Nyieun Suling

        

 

 

 

 Sakadang kuya manggih tulang maung ti leuweung. Ceuk pikirna alus lamun

dijieun suling. Ngan kusabab menehna mah teu bisaeun ngaliangan, kapaksa menta

tulung ka  sakadang bangbara. Sanggeus diliangan tulang maung teh bisa ditiup.

        “Tret trot tret trot,

        suling aing tulang maung,

        diliangan ku bangbara,

        torotot heong.”

        Ngan ceuk pikir kuya masih keneh kurang alus, kudu ditroktrokan heula. Harita

keneh manehna nepungan sakadang caladi. Kabeneran caladi teh daekeun. Sanggeus

ditroktrokan mah suling teh rada alus.

        “Tret trot tret trot,

        suling aing tulang maung,

        diliangan ku bangbara,

        ditroktrokan ku caladi,

        torotot heong.”

        Sakadang kuya ngarasa can sugema, sabab ceuk rasana suling teh tacan sampurna. Keur nyampurnakeunana kudu dipasieup heula. Ceuk dina pikir kuya nu ahli masieup teu aya deui lian ti sakadang sireupeun. Harita keneh kuya indit nepungan sireupeun. Sanggeus dipasieup suling teh ditiup deui.

        “Tret trot tret trot,

        suling aing tulang maung,

        diliangan ku bangbara,

        ditroktrokan ku caladi,

        dipasieup ku sireupeun,

        torotot heong.”

Read More

Kuda Hade Budi

Kuda Hade Budi

 

        Aya Maung eukeur mah geus kolot katambah gering, ngalungsar handapeun tangkal kai bari gegerungan. Sato-sato nu kungsi menang kanyeri ti manehna ngarumpul ngariung nu keur gegerungan tea. Ceuk Munding, “Ah siah make gegerungan! Rek nyambat ka saha? Moal aya nu nyaaheun ka sia mah! Sato jahat!” Munding ngomongna kitu bari ngagadil nu keur gegerungan. Nempo kalakuan Munding kitu sakur sato nu harita aya di dinya sareuri akey-akeyan.

        Kabeh sato nu aya di dinya ngaheureuykeun Maung nu keur sakarat, kajaba sakadang Kuda. Nempo sato-sato sejen galumbira teh manehna mah ukur gogodeg. Ceuk Domba, “Kunaon sakadang Kuda kalah gogodeg kitu? Lain tejeh tah si Belang teh ku sampean! Lain baheula si Belo ditekuk?” Tembal Kuda, “Kaula mah lain teu ngewa kana kalakuan Maung teh. Ngan waktu ieu kaayaanana pan keur gering parna. Manehna teh keur sakarat, sakeudeung deui oge paeh. Kuduna mah sato nur keur sakarat teh ulah dihareureuykeun kitu. Meureun ceuk batur teh, rajeun aya kawani ka anu keur sakarat!” Sanggeus ngadenge omongan Kuda kitu, sakur sato nu aya di dinya jempe sarta patinglaleos ka leuweung deui.        

Dicutat tina: Bacaan Barudak “Kuda Hade Budi”

Read More